Inhalt

 

Home
Beitrittsformular
Veranstaltungen
Publikationen ETV
Anfänge
Totentänze nach Ländern
Totentänze nach Medien
Film
Graphik
Literatur
Musik
Tanz
Künstler der ETV
Bibliographie
Kontakt
Heiderberger Blockbuch

Anonymus: Vierzeiliger oberdeutscher Totentanz, Heidelberger Blockbuch, um 1460-1465.

 

Der toten tanz.

O deser werlde weysheit kint
Alle die noch ym leben sint
Setzt yn ewr hercze zwey wort
Die von cristo sind gehort
Daseyne komet her das ander gehet hyn
Dach des ersten die guten haben gewyn
So sie yn den hymmel komen
Do nemen sie des guten fromen
Das ander die boezen weyzet yn peyn
Der hellen. dy ouch ewig wirt seyn
Dorvm ich euch getrewlich rathe
Tut euch abe oppiger thate
Wenne dy zeit yst korcz yn desem leben
Dor noch wirt ach vnd we gegeben
Dorch den czwefechegen tod
Der die oppigen brengit yn not
Wenne mit seyner pfeyfen geschrey
Brengt her sie alle an seynen reyn
Doran dy weysen czu den sprungen
Mit den toren werden gecwungen
Als dezes gemeldis figuren
Synt eyn eben bild czu trawren


[1. Tod und Papst]

Her bobist merkt off meyner pawken don
Ir sullet dornoch hie springen schon
Ir dorfet keyns dyspensiren
Der tod wil euch den tancz hofyren

Ich was eyn heiliger bobist genant
Die weyle ich lebete ane forchte bekant
Nw werde ich gefurt frefillich
Czum tode ich were mich oppiglich

[2. Tod und Kaiser]

Her keyser euch hilft nicht das swert
Czeptir vnd crone sint hy nicht wert
Ich habe euch bey der hand genomen
Ir must an meynen reyen komen

Ich kunde das reich yn hoer eren
Mit streyt vnd fechten wol gemeren
Nw hat der tod obirwunden mich
Daz ich byn wedir keyser noch menschen gleich

[3. Tod und Kaiserin]

Ich tancze euch vor frawe keysereyn
Springt mir noch der rat yst meyn
Die sperbrechir sint von euch gewichen
Der tod hot euch alleyne dirslichen

Wollust hatte meyn stolczer leib
Do ich lebete als eyns keysers weib
Nw hot mich der tod czu schanden brocht
Daz mir keyn frund yst mer irdocht.

[4. Tod und König]

Her kunyg, ewr gewald hot eyn ende
Ich wil euch fueren bey den henden
An desir swarczen brudertancz
Do gebt euch der tod eynen crancz

Ich habe alz eyn kunyg geweldigleich
Die werld gereigiret als reyn das reich
Nw byn ich mit todis banden
Vorstrickt yn seynen handen

[5. Tod und Patriarch]

Her priarch, nw lod euch syngen
Ir must mit mir den reyen springen
Das czwefache crewcze loth fallen
Der tod wil mit euch schallen

Ich habe das czwefache crewcze getragen
Als eyn patriarch bey meynen tagen
Nw wil mich der tod twingen
Mit seynen geseln czu springen

[6. Tod und Erzbischof]

Seyt ir yn hoer wirde gesessen
Erczbyschoff des yst gar vorgessen
Euch kan gehelfen wedir creucze noch pfaffen
Ir must tanczen ouch mit desen affen

Ich trug mit hoer wirdikeit
Das creucze vor der pfafheit
Als eyn erczbyschoff das tragen sal
Nw gee ich an deser toten czal

[7. Tod und Kardinal]

Springit off mit ewrem roten hutt
Her cardinal der tancz yst gutt
Ir hat geseynet wol die leyen
Und must nw mit dem tode reyen

Ich was mit bobistlicher wal
Der heiligen kirchen cardinal
Nw byn ich dor czu getwngen gar
Das ich tancze an des todis schar

[8. Tod und Bischof]

Ewr wirde vnd ere hot sich vorkart
Her byschoff weyze vnd wol gelart
Ich wil euch an den reyen czyen
Da ir den tot nicht mogit entpflyen

Ich byn wirdiglich geerit wurden
Dy weyle ich lebete yn byschofs orden
Nw czyen mich dy vngeschaffen
Czu dem tode als eynen affen

[9. Tod und Herzog]

Habit ir mit frawen ye hoch gesprungen
Stolczer herczog adir wol gesungen
Das must ir an dezem reyen bussen
Wol her lot euch die toten grussen

Ich habe die edeln hirren werth
Alz eyn herczog geregiret mit dem swerth
Nu byn ich yn leynen cleydern glancz
Betwungen an des todis tancz

[10. Tod und Graf]

Her grofe heist euch den keiser helfen
Ich brenge euch hie czu wilden welfen
Mit den ir must tanczen yagen
Der tot wil euch des nicht vortragen

Ich was yn der werlde genant
Eyn edler grofe dem reyche bekant
Nw byn ich von dem tode gefelt
Vnd hie yn seynen tancz geczelt

[11. Tod und Ritter]

Her rytter ir seyt an geschreiben
Das ir nw ryttirschaft must treiben
Mit deme tod vnd seynen knechten
Euch hilft wedir schympf noch fechten

Ich habe als eyn strenger rytter gut
Der werlit gedynet yn hoem mut
Nu byn ich wedir rytters orden
An dezen tancz getwungen worden

[12. Tod und Abt]

Tanczt mir noch, her kogilweyt
Wy wol das ir eyn apt seyt
Ir must des todis regil halden
Der wil ewers leybis walden

Ich habe vil monche als eyn apt gelert
Garstrenge dirczogen vnd wol gemert
Nu byn ich selbir hie betwungen
Und mit des todis regil gedrungen


[13. Tod und Jurist]

Das ortil yst alzo gegeben.
Das ir lenger nicht sullet leben.
Her iurist das tut des todis craft.
Mogit ir zo beweist ewr meisterschaft

Keyn appelliren czu deszir czeit
Hilft vor todis harten streyth
Her obirwint myt seynem geslecht
Das geistliche und das wertliche recht

[14 Tod und Chorherr]

Her korpfaffe habit ir gesungen vor
Suszen gesang yn ewrem kor
So merkt off meyner pfeyfen schal
Die vorkundit euch des todis val

Ich habe als eyn korhirre frey
Gesungen manche lipliche Melodey
Des todis pfeyfe stet deme nicht gleich
Sy hat zo zere dirschreckit mich

[15. Tod und Arzt]

Her arczt thut euch selbir rat
Mit ewir meisterlichen tat
Ich fuere euch czu des todisgesellen
Dy mit euch hie tanczen wellen

Ich habe myt meynem harnschawen
Gesund gemacht man vnd frawen
Wer wil nw machen mich gesund
Ich byn czu deme tode wund

[16. Tod und Edelmann]

Komet her ir edlerman
Ir must der sterke pflegen an
Mit deme tode der nymandis schont
Legit ir nw oben euch wirt gelont

Ich habe manchen man dirschreckit
Der wol was mit harnisch bedeckit
Nun irschreckit mich hie der tod
Vnd brengit yn die engistliche not

[17. Tod und Edelfrau]

Edilfrawe tanczt noch ewrem synne
Bas dy pfeyfe rechte don gewynne
Sy hot der frawen vor vil betrogen
Die allir der tod hot hyn geczogen

Ich solde treyben iuchczens vil
Sehe ich vor mir der freuden spil
Des todis pfeyfe mich betreuget
Der tanczgesang hie felschlichen leuget

[18. Tod und Kaufmann]

Her kawfman was hilft euch ewir irwerben
Dy czeyt ist hie das ir must sterben
Der tot nympt wedir gut noch goben
Tanczt mir noch her wil euch haben

Ich hette mich czu leben vorsorgit wol
Das schrein vnd kasten weren vol
Nu hot der tot meyne gobe vorsmach
Und mich vmb leib vnd gut gebroch

[19. Tod und Apotheker]

Wolher aptheker an meynen tancz
Seyn nw die species schyre gancz
Dy do synt wedir todis craft
Beweyst nw ewir meysterschaft

Ich kunde syrop vnd confect machen
Electuaria vnd vil ander sachen
Wer nw erne eyns gut vor den tot
Is wer mir czu dezer stunden not

[20. Tod und Nonne]

Fraw nonne ir dunkit euch subtil
Dezen reyen ich mit euch tanczen wil
Werft von euch den scapular
Ir must hie mit dem toten farn

Ich habe yn dem closter meyn
Gote gedynet alz eyn geweytis noneleyn
was hilft mich nw meyn beten
Ich mus des todis reyen treten

[21. Tod und Koch]

Koch du kanst gute pfeffirlyn machen
Hoppe off ich wil dich besachen
Dy do vorne an dem reyen sleichen
Den saltu pfeffirlyn ÿn streichen

[Ich h]abe irlert vil pfeffirsecke
[Und g]emacht manch susze gelecke
[Und] kudich des kostlyns nye fynden
[Darmit] methe ich den tot moechte obirwynden

[22. Tod und Bauer]

Pewrlyn mit deynen schuen grob
Rawsche her du must irwerben lob
An dezem tancze dohyndin
Do wil der tot dich fynden

Ich habe gehabt [vil arbeit gross]
Der sweis mir du[rch die haut floss]
Noch wolde ich ger[n dem tod empfliehen]
Zo habe ich des glu[cks nit hie]


[23. Tod und Krüppel]

Hynke her an myt deyner krucken
Deyn ding das wil sich gelucken
Dich haben die lebenden nicht vor gut
Der tot dir besundern gnade tut

Eyn armer geiler hie ym leben
Czu eynem frunde yst nymande eben
Abir der tot wil seyn frund seyn
Her nympt den armen mit dem reichen hyn

[24. Tod und Mutter]

Nw sweiget vnd lot ewir krigen
Loft dem kinde noch mit der wygen
Ir must alle beyde an desen tancz
Fraw lacht zo wirt der schympf gancz

O kind ich wold dich haben irlost
Nw ist empfallen mir der trost
Der tod hot das vorkomen
Vnd mich mit dir genomen

[25. Tod und Kind]

Kreuch her an du must hy tanczen lern
Weyne adir lache ich hore dich gern
Hettistu den totten yn dem munde
Is hilft dich nicht an desir stunde

Awe liebe muter meyn
Eyn swarczer man czeut mich do hyn
Wy wiltu mich nw vorlan
Nw mus ich tanczen vnd kan noch nicht gan

Zurück

Anschrift

Europäische Totentanz-Vereinigung, Leipziger Straße 48, 06766 Bitterfeld-Wolfen
Henry Schuhmacher (Präsident) Mail: h.schuhmacher@totentanz-online.de